星級髮型師阿GILL

朗朗自細, 我就好怕帶佢出去剪頭髮架喇

識佢0既人都知啦, 佢細個時, 係個超級無敵大喊包黎架嘛

出親去剪, 都喊到收唔到聲

喊都算喇, 剪剪下, 又話要中場休息

一時又話要落地抖下, 一時又話要食下包

結果, 去親剪頭髮, 都剪成幾個鐘....

雖然, 髮型師係相熟0既, 人地亦都冇投訴佢麻煩

但自己都唔好意思啦......

結果, 間唔中, 我會為阿仔親自操刀

替佢剪頭髮

最初, 其實真係剪到好雞手鴨腳架

仲好記得好記得第一次替朗朗剪頭髮

自己一覺唔留神, 剪到朗朗隻耳仔爆剛

0個獲佢都流左唔小血, 鴻仔仲鬧到我半死添.....

幸好, 當時朗朗佢年少無知, 俾粒糖佢, 佢就收番聲....

哈.....俾著係而家,  實嬲死我呀.....

雖然, 0個次攪到阿仔咁

但我仲係死心不惜, 堅持要自己剪

見佢左閃右避

我仍然笑笑口, 粗暴對待

回想起黎, 都覺得自己好變態

當年, 每次為朗朗剪髮, 都總係會出事

呢個經典V字頭, 足足俾婆婆笑左大半年

(0的蔭攪成咁, 又真係幾值得笑0既.....哈哈)

後黎, 有一次

又再朗朗0的蔭剪到極短

雖則係剪得咁差, 但我仍然屢敗屢戰

而朗朗, 亦欣然接受, 仍然肯任我魚肉

不過佢肯, 鴻仔都唔制

次次我替朗朗剪完髮, 佢總係會嚴正聲明

同我講, 下不為例

終於, 有一次

鴻仔忍唔住, 決定親自帶朗朗去SALON

剪番個人0既頭

自此, 朗朗0既髮型再冇咁格格衰衰啦!!!

後黎, 仲同爸爸一齊整左個型爆飛機頭添!!!

超索..........

不過飛機頭兩側0的頭髮成日都長得好快

所以, 我間中都會替佢剃下頭

然而, 試過好野0既人

係點都唔會肯入番地獄

自此, 朗朗再唔肯俾人亂搞個頭.....

所以, 我最後決定要向魚仔下毒手

哈哈, 諗住俾魚仔一邊食餅, 一邊剪頭髮

應該會係兩全奇美啦........

結果, 魚仔連頭髮都食埋, 喊爆收場

而且, 星級髮型師阿GILL, 仍然冇乜進步

仲係將0的仔, 剪到一岩一忽

呵, 不過似乎日子有功

我終於都大成功啦!!!

今朝, 替魚仔剪頭髮, 終於剪到齊齊整整, 靚靚仔仔啦.....

YEAH.......

聽日, 會再替哥哥剪, 希望都係咁掂過碌庶啦, 哈哈!

HEHEEE…

我地最近開左個 FACEBOOK 專頁呀

大家可以 CLICK 一 CLICK 呢度

再 LIKE 一 LIKE 0個度....

同我地做個朋友仔啦!!!!