2016年4月17日星期日

謝安琪

0係啱啱0既星期五
同鴻仔兩個二人世界, 去左睇謝安琪演唱會.....
其實, 原先都冇諗過要去睇的
我....就係一個咁悶, 咁冇情趣0既人黎架喇....
比起拍拖, 其實我會鐘意家庭生活, 鐘意做野多的囉....哈哈....
不過又咁講
我唔需要拍拖0者, 都要俾番小小家庭溫暖鴻仔0既....
有時, 男人都鐘意人陪, 鐘意人氹0架嘛
見鴻仔咁想睇, 所以, 我就一口答應, 話陪佢去睇啦....





一直以來, 其實都冇特別留意過謝安琪
印象中佢係高登女神, 宅男偶像
對於佢, 我冇特別0既欣賞
(可能, 我真係冇乜留意樂壇啦, 
哎, 幾十歲人, 唔會好似以前0靚妹年代咁走去聽歌睇明星啦!)
不過, 今次呢個演唱會後
說實的, 我打從心底的.....有小小鐘意左佢.....



好記得演唱會一開始時
佢就同大家講, 今年係佢0係樂壇第十個年頭
演唱會後, 佢會放一個可能好長0既假期....
0係今個演唱會, 會唱一些自己覺得最驕傲, 最表逹到自己0既音樂出來
結果, 整個演唱會唱出黎0既唱, 都叫非主流
不過, 卻讓人睇到一個好真實的她
好欣賞佢, 不賣弄K歌
好有心唱好歌的一位歌手
每一首歌, 都有佢0既中心思想
獨家村, 山林道
好多都是發人心醒0既歌, 全部我都好鐘意哦!



唱到中段, 佢唱了甄妮姐姐0既奮鬥黎鼓勵自己
講真..... 我都好被感動哦.....
一個咁有成就0既謝安琪, 仲係有一顆咁有奮鬥0既心
其實, 0係工作上, 我間中會感到好沮喪, 好疲累
成日都覺得做到好攰, 有時又難免會有點灰心
我其實真係一個好易放棄0既人黎架.....
我好多時, 總會半途而廢的....
明明有一個大方向, 好想走過去
結果, 又永遠都好以小朋友玩泥沙一樣
做做下, 覺得難, 又想懶, 跟住就唔做....
睇到一個咁0既謝安琪
我由衷的好想加把勁
好想好想自己能夠有小小作為
又好想好想自己唔好再好似以前咁, 咁唔成熟
話放棄就放棄

我希望, 有一日
我會成為一個有用0既人, 有用0既大媽
大家都要為我打打氣哦!




琴日睇報導
有記者問阿Kay: 現在佢放長假, 老公擔起頭家, 會唔會有壓力?
佢卻答: 生活好豐儉由人

我相信, 佢真係唔是吹水
佢地一家, 都好平民, 同普通人一樣
會0係大埔超級城出入
完全冇架子, 真心覺得佢唔係0個種好重視物質生活0既人

仲記得, 好多年前
0個時我都仲未生朗朗, 鴻仔有間鋪0係大埔的
當年, 安琪BB 啱啱開始走紅
有一日, 佢居然撞入鴻仔0既鋪頭買衫
我地真係有點難以置信
你知啦, 明星喎.... 
你點會諗到佢會幫襯我地呢0的小店呢....
而且大埔廣場....呢0的咁up得0既小商場
你點諗到佢會0係度行街喎.....
可惜啦, 看鋪0既唔係鴻仔亦唔係我
唔能夠同佢近距離接觸, 真係超可惜哦.....
佢....就係咁普通的一個人....
好欣賞, 好欣賞佢
願佢, 將來0既日子, 會為我地帶來更好0既音樂





  HEHEEE…
我地最近開左個 FACEBOOK 專頁呀
大家可以 CLICK 一 CLICK 呢度
再 LIKE 一 LIKE 0個度.... 
同我地做個朋友仔啦!!!! 


至於想了解最新韓國服飾, 請支持GILL仔ONLINE小店
LIKE 下我地啦!!!!!
好多正嘢買!!!!

IG: STUDIO.COM.KR


























2016年4月10日星期日

生仔6年有感

唔經唔覺, 大仔六歲, 細仔都不知不覺間四歲啦
呢六年黎, 過得一點都不簡單
吵吵鬧鬧, 又喊又笑
間中我會好似瘋婦潑婦一樣的鬧仔
又間中, 我會同佢地玩作一團, 笑到停唔到口
六年黎, 既充實, 又激心, 既艱辛, 又開心
真係差0的湊仔湊到人格分裂啦!哈....

睇開我個blog 0既朋友大概都知道的
朗朗, 其實並唔係預計之中咁生育的
我地結婚冇耐, 去完個蜜月旅行, 就話唔小心有左啦....
當年, 我仲係好唔成熟, 完全冇諗過有左之後要點
湊小朋友, 照顧一個家又會係點
只係覺得, 有左咪有左囉, 多個玩具玩之嘛
都唔明點解鴻仔會覺得咁抑鬱

生完出黎, 就知味道啦....
晚晚餵夜奶, 個衰仔又鐘意喊....
真心覺得好煩....好煩....好煩....
朗朗出世0既頭三個月, 說實的, 我對佢都冇半點感覺
總之, 就唔會特別鐘意佢啦....
都唔明佢契姐點解成日同我講佢好得意....
不過, 女人唔多唔少, 天生都會擁有著母性的吧....
我諗朗朗未到半歲, 我就已經俾佢溶化啦....
成日都覺得佢好搞笑, 又好得意....
雖然份人有點煩, 但有時嗲嗲豬, 又好得人鐘意0既....

前一篇blog講細佬難湊
其實, 哥哥都唔好得去邊
哥哥係一個好扭得計0既小朋友來的
佢痴身, 個性亦有點頑固
仲記得, 佢細個時, 真的好變態
推bb車, 一定要指定我推, 如果爸爸推, 佢就會喊得好犀利好犀利


然後, 其實兩兄弟語言能力都一樣0既差, 朗朗仲要咬字好唔正
想當年, 佢表逹唔到, 講極都講唔明, 就會變得好忟憎,
繼而, 就會嚎哭起黎
其實, 兩兄弟表逹唔到, 真的讓大家都好難受
好似細佬而家都係, 佢一遇到件事
可能係俾哥哥撞一下, 佢就諗都唔諗, 會用喊黎表遠自己
我諗, 如果講野叻0既小朋友
俾人撞一下, 就會走去同媽媽講, 哥哥撞到我...借機投訴下, 之餘此類
但佢地兩兄弟都唔會, 佢地遇到任何事, 就立即用喊黎表達
佢地喊, 我又唔知佢想點, 又唔知佢發生乜野事
我唔知, 安慰唔到佢
佢又會停唔到咁繼續喊
總之, 就係佢一直咁喊, 又講唔到發生乜野事, 又收唔到聲
我0既耐性, 真的有個限度囉....
我都會好忟.....


老公成日同我講
都唔知點解要生佢地
又煩, 又成日喊
覺得, 有左佢地, 生活仲冇以前咁開心添.....
其實, 我都覺得未有小朋友之前
兩小口係活得幾開心架
可以放工一齊睇電影, 去下街, 食下飯, 拍下拖
兩個人, 想去邊就去邊, 想做乜就做乜
生活開支又冇咁大
而且, 未生前, 其實我地好小會嘈交架
而家, 卻成日為小朋友嘮嘮嘈嘈


仲記得, 曾經我睇過另一位媽媽0既文章
我記得佢初初都唔想生架
不過, 有blog友就同佢講
人生, 唔同階段就要經歷唔同0既事
人總唔能永遠停留0係20幾歲度
總唔能夠永遠過住20幾歲無拘無束0既生活
生活是要經歷過, 你才會懂


其實, 我都好認同
兩個人一齊, 的確有兩個人一齊的快樂
但現在四個人一齊, 0個種快樂, 又係另一回事了
現在生活, 雖然少了兩口子的甜蜜, 卻多了四小口的溫馨
都係0個句, 有0的事情, 如果冇生小朋友, 
我諗我係永遠唔會再做的
好似上次去張保仔洞.....
如果, 冇朗朗同魚仔, 我諗我未必會再踏足此地
但係因為阿仔佢地, 我卻會做野0的咁唔尋常0既事
連我自己, 都好佩服自己哦.....



真的覺得.....生小朋友雖然好勞氣......第時又或者會係冇任何回報.....
但係, 真的覺得
有左佢地, 我好充實, 好幸福, 亦都好快樂哦....
如果再來一次, 我都一樣, 會生小朋友.....一定一定的.....






  HEHEEE…
我地最近開左個 FACEBOOK 專頁呀
大家可以 CLICK 一 CLICK 呢度
再 LIKE 一 LIKE 0個度.... 
同我地做個朋友仔啦!!!! 


至於想了解最新韓國服飾, 請支持GILL仔ONLINE小店
LIKE 下我地啦!!!!!
好多正嘢買!!!!

IG: STUDIO.COM.KR



2016年4月7日星期四

細佬豬四歲了

時間過得真係好快
我地個細佬豬, 轉眼間, 4碎了.....
佢出世咁耐, 說實的, 都沒有好好花時間0係佢身上
真係覺得, 有點愧對細佬豬哦.....


其實唔是唔錫細佬呀
沒有花時間0係佢身上, 一來, 哥哥大啦, 學校做功課佢又往往做好耐
K2時, 又成日做到喊....
然後, K3今年, 學校開始默書, 又要忙溫習
有時, 真係覺得好分身不下....
二來, 其實性格上, 細佬一直都是個唔麻煩的人
好似坐巴士咁, 佢一般都會自己安靜的睇風景
唔會問東問西, 唔會纏繞住人的....
基本上, 佢唔會好似哥哥咁, 要你陪佢玩, 陪佢傾計.....
或者是因為咁啦, 一直唔多唔少, 都忽略左細佬豬....


舊年, 同朋友傾開
開始發覺細佬有0的唔妥
語言能力好差, 三歲半0既佢, 如果口渴, 只會講單字"水", 唔會講"我想飲水" 
更加唔駛指望佢會識講, "我好口渴呀, 可唔可以俾0的水我飲?"
然後小手肌差, 行路又唔知點解總係好易碌低
同人講野, 眼睛總係唔望人, 脾氣亦都好大
如果一大班小朋友 playdate 為例, 
佢一般只會行行企企, 唔會埋堆, 自顧自的玩車
老師仲話, K1開學0既頭一個月, 佢0係學校直情冇講過一句說話
然後, 我開始覺得, 真係唔可以俾佢咁落去
0係湊佢番學0既巴士上, 我嘗試同佢傾下計, 了解下佢....
然後發覺, 佢真係好奇怪
好似咁呀, 我問佢: 今日番學點呀, 開心嘛?
魚仔: 媽咪, 0個架車去邊架?
我: 唔知架車去邊呀! 點0者, 你番學好唔好玩0者
跟住, 魚仔就自顧自的繼續看風景, 完全唔應人
真心覺得好難攪....覺得完全入唔到佢個世界
你同佢講野, 佢就好似活在自己個世界裡面
你問佢東, 佢就答你西
好似完全唔理外界0既事, 只係關心自己關心0既野一樣.....
只係關心佢自己最鐘意0既巴士


其實老師都好好, 佢上堂一直都是滋事份子
佢好似完全聽唔明老師指令咁
成日0係課室走來走去....唔會理人感受....
其實, 而家上左大半年學, 佢仍然有出位遊街0既問題
但老師都好包容, 沒有放棄佢

從佢0係屋企, 學校0既行為
我然後, 終於覺得, 佢應讓係有問題的....
雖然, 現在仍然未證實
但我自己覺得, 佢應該係有自閉傾向的


於是, 從舊年十月開始
我便每天努力的同佢講野
嘗試同佢溝通
初時, 講十句, 佢都唔會答我一句
我直情覺得, 我好似個儍婆一樣
乜都自己講一餐, 自己同自己講野一樣
有幾下, 我真係有點想放鬆.....真係覺得自己進入唔到佢個世界哦.....
之但係, 漸漸, 我發覺佢好似打開左小小心扉
問佢七句, 佢開始會答我一兩句
然後又由兩三個字0既對答, 進步到講到四五個字的句子



去到四歲0既今日
雖然, 或者佢仲未係一個好正常0既小朋友
但係, 我真心覺得佢進步左好多啦
早兩日, 我同佢去圖書館.....
仲記得, 三四個月前, 要佢坐定定陪我睇一本書, 佢根本唔會做得到
但係, 現在0既佢, 真係定左好多啦, 
可以坐定定同我睇半個鐘頭書都面不改容
然後, 呢兩三個月, 佢亦都再冇0係街頭訓地
眼神交流亦有所進步....
真的好感恩哦.....


多左接觸細佬, 先發覺
其實, 佢係一個好可愛0既小朋友黎架
雖然, 偶爾佢係好反斗, 你叫佢唔好做0既事, 佢就偏偏要做
然後又好鐘意做一0的, 明知你唔想佢做0既事
但其實佢, 佢只係好想被愛, 好想被疼錫而已
或者, 佢只係唔知點樣先可以讓人注意到佢吧.....
而且佢有時, 都好嗲嗲豬, 又好攪笑的, 
面上總帶點奸奸地0既笑容, 
我地取笑佢時, 佢又會陰陰咀笑
細佬佢, 真係好得意架....




細佬細佬, 你四歲啦, 真係長大啦
媽媽以往沒有好好的照顧, 對唔住哦
媽媽, 真係唔係唔愛你架
我.....雖然有兩個仔, 但係, 兩個我都一樣咁愛
希望, 媽媽能夠憑住我對你0既愛, 讓你慢慢走出來
希望你, 往後0既日子, 能夠更懂得去表逹自己, 更懂得與人相處
亦願你永遠面帶笑容! 永遠都咁可愛! 愛你哦......




  HEHEEE…
我地最近開左個 FACEBOOK 專頁呀
大家可以 CLICK 一 CLICK 呢度
再 LIKE 一 LIKE 0個度.... 
同我地做個朋友仔啦!!!! 


至於想了解最新韓國服飾, 請支持GILL仔ONLINE小店
LIKE 下我地啦!!!!!
好多正嘢買!!!!

IG: STUDIO.COM.KR






2016年4月1日星期五

朗朗學數學-FS Education 富成教育

一直都好擔心
唔知朗朗派位會派成點.....
對面大抽奬, 我地無野可以做到.....
唯一可以做的, 就係同朗朗積極備戰
多0的操下卷, 做下練習, 
希望萬一真係要叩門, 朗朗都能夠應付得到嘛!!!

其實我地對叩門都係一知半解架咋....
只係知道近年叩門, 並非易事
聞說有0的學校考講故事, 又聞說有0的學校考做卷
之前都同鴻爸爸講好左架喇
我就負責教朗朗中文, 佢就教朗朗數學.....
都想0係樹讚下爸爸, 佢果然講得出, 亦做得到
真的很認真地替朗朗惡補數學....
然而, 一來朗朗資質麻麻, 二來爸爸耐性亦好有個限度
教過朗朗好幾次之後, 爸爸已經不斷投訴....
有睇我地FB 的, 應該都略知一二吧.....




往事一則


鴻仔:35+27寫條橫式出唻
朗寫為 「3+5+27=」
鴻仔:35+27啊😑唔係咁啊

朗:你話 三十五 加 廿七嗎?

鴻仔:(成個人著左火)🔥
🔥🔥
其實你想點呢😑3同5係阿拉伯數字😑十係中文字😑你明知唔啱都係要咁寫😑再寫過
😡





於是朗寫為 「3105+27=」
今次仲扯火
🔥🔥🔥

鴻仔:其實你係乜嘢心態呢😑😑😑點解要咁做呢😑😑😑
朗朗:3 10 5 +27
😊

鴻仔:好😑明白😑你自己入房想清楚再出唻
👋
🏻諗到點寫話我知😑

最扯火係面對這種專登玩嘢之人
🔥



咁0既情況.....
我怕鴻仔繼續教落去
我地屋企.....總有一日發生血案....
最後, 為免傷父子之間和氣
仲係決定.... 出去俾人教算啦.....

上網睇過下0的資料
最後選定左富成教育

富成0既地點都好方便
灣仔同旺角都有Centre

我好詳細咁睇下0的資料
佢地0既Magic 13數學速算法真的好吸引
通過佢地教授0既技巧,學生可以於13秒內完成每條數學題目
即係0係閱讀題目後的10秒內解題,找出應使用的公式,並於3秒內找出答案
而家朗朗只係上左幾堂, 梗係冇咁勁啦....
不過, 希望不久0既將來, 佢能夠學成歸來啦....哈哈

去一去相先


哈, 朗朗雖則冇乜資質
但佢私下同我講, 其實佢係好鐘意計數架
所以, 都非常咁願意去學數學


第一堂去到
教數學0既, 原來係位阿SIR
見佢都幾識氹細路仔, 而且, 偷聽左一陣
覺得佢都幾有耐性.... (同爸爸真係天壤之別.....)
雖然數學比較抽象, 對小朋友黎講, 會比較難掌握
但佢巧 funny, 用好有趣0既方法, 深入淺出咁教小朋友
朗朗超鐘意阿Sir哦!



呢堂教長方體
用左一0的磁石珠珠砌呀砌, 砌呀砌
好快, 朗朗就明乜野為之正方體, 長方體等等等等
活動教學, 呢個超讚哦!!!!



然後, 又考下朗朗0既數感
俾0的咭咭佢訓練佢加減數
好采, 爸爸之前有跟開佢, 阿sir話佢都ok掌握到晒!



真的唔明點解, 一樣教數0者
點解爸爸教到勞勞嘈嘈, 嘔晒血咁
阿sir三兩下功夫, 俾幾張咭佢, 佢會好似玩得好開心咁....
真心覺得, 人地教同自己教真的差好遠好遠架.....



而家暫時上左幾堂
阿 Sir 都跟得好好
見佢教梗文字題啦..... 阿Sir仲超好, 逐個字逐個字教佢睇題
連中文認字都替我教埋.....超好哦....
然後堂堂番去都有小小功課
我見朗朗都有0的進步
希望, 佢愈學愈起勁啦! 
加油哦, 朗朗!!!!!