四人同行之苦了鴻仔

其實, 我同鴻仔, 一直關係都好好好好

拍拖年代, 根本就冇嘈一次過交

結婚後, 一直更係相安無事, 彼此體貼

但係, 生仔之後, 問題就天天都多....

唔知, 其他夫婦會唔會都係咁0架呢????

我地二人, 大家對育兒問題,有時會有好多0既爭拗

有時, 見到佢咁對0的仔, 我會好勞氣

又有時, 佢見我諸多管制, 又會覺得我好無謂

總之, 有左細路之後, 我地就成日都會為芝麻綠豆0既事而嘈啦

其實, 嘈交又唔會話嘈得好嚴重0既

不過, 我會覺得, 我地0既婚姻長此下去, 會亮起黃燈!!!

最近, 我覺得鴻仔對我多左微言哦....

不時, 都會聽到佢會問我: 你花幾多時間0係我度????

其實之前, 我都諗過架, 都好想陪多0的佢....

不過, 最近細佬開始大啦, 呢幾個月黎, 需要媽媽0既時間多左

而家分分秒秒, 都好想媽媽 focus 去佢度

而哥哥呢, 更加唔駛講, 由細到大, 都係痴身膏藥....

有時, 鴻仔打電話番到屋企, 想同我傾下計, 講下今日發生0既事

我就一路都忙著湊仔, 卜一聲就吸左佢線....

我知, 佢真係好無癮0架....

唉, 不過, 0的仔又0係樹狂喊

喊到鬼殺咁嘈, 唔通仲掛住傾電話, 唔理佢地咩.....

鴻仔, 我知0架.....

我近年真係花唔好乜野時間俾你

我知, 你好需要關心, 好需要問候

但我, 就總係唔能時常陪伴你左右

我講過, 會照顧多0的你0既感受, 但轉個頭, 我又掛住忙0的仔

轉過頭, 又忘記顧念你感受啦....

有時, 我真係唔知可以點做....

人就得一個, 要瓜分成為三份.....

哎, 我真係有小小諗唔掂呢....

只能夠話....

鴻仔, 我會努力0架, 你都要包容哦....

啱啱睇番0的相

發覺, 其實我地以前真係幾開心架

想去邊就去邊

想出夜街就出夜街, 自由自在, 無拘無束

 

永遠都係二人世界

我0既生活, 就只有鴻仔一個人

鴻仔0既世界, 又只係得我一個人

 

有左細路之後, 真係乜都唔同晒啦....

想間中出去拍下拖都唔得, 所以, 都難怪鴻仔會炸型0既

 

有時, 我都會掛住當年二人世界0既日子架

 

啍..... 自從呢條蛋散出左世之後

我地夫妻二人, 就再唔似以前咁纏綿啦

 

經常都要三人行

就連結婚紀念日, 都離唔開佢呢

 

我好記得, 好記得

臨生魚仔之前, 我地PLAN 左一家三小口去澳門賀生日架

結果, 0個次朗朗不幸入左廠

我地先有機會二人同遊澳門咋

真係極難得二人世界耶

魚仔出世之後

唔駛講都知..... 二人世界係冇可能0既事....

 

睇番0的相薄, 根本就再搵唔到二人合照啦

唔係一家四口0既相, 就係佢地兩隻野0既相

可想而知, 我0既生活

再唔似初初結婚時咁, 生活上只有鴻仔呢一個人

我0既世界, 而家有著三個男人

哎呀....三個都係我好愛0既人

叫我如何選擇呢????

唯有...叫鴻仔你睇開0的啦...

你都知啦, 小朋友只係得十年0既保存期

十歲之後, 佢地再唔會痴住我地兩老0架喇

過多八年, 你想去邊度拍拖, 去邊樹睇戲都得啦, 係咪?

 而且, 其實我地都唔係咁慘0者

至少, 有左兩隻仔之後, 都試過二人世界去旅行呀.....

鴻仔, 放心啦, 我會努力架喇

你都試下包容下啦

8年, 好快過架咋

約定你8年後日日都去拍拖拖啦, 哈哈!!!

 HEHEEE…

我地最近開左個 FACEBOOK 專頁呀

大家可以 CLICK 一 CLICK 呢度

再 LIKE 一 LIKE 0個度....

同我地做個朋友仔啦!!!!