朗朗開心SLEEPOVER

朗朗自出娘胎以黎, 一直都係痴媽B

媽媽行東, 佢唔敢行西

媽媽行西, 佢唔敢行東

我一直都覺得, 佢成個裙腳仔咁, 無鬼用....

原來....原來....我錯啦....

原來....不知不覺間, 佢長大啦....

再唔係好似以前咁, 淨係鐘意痴住媽媽....

四歲兩個月0既今日, 朗朗居然提出, 話要去以恒屋企 SLEEPOVER

你知嘛, 早兩個月時, 以恒已經不斷邀請朗朗過去訓架喇

但當時, 佢仲係同以恒講: 我想同媽媽, 細佬一齊呀

估兩個月之嘛, 佢就變左心啦....

 

其實, 我0既心情,真係有小小複雜

作為媽媽, 我好開心, 哥哥有自己0既好朋友, 有自己0既世界

見到佢開始獨立, 再唔裙腳仔, 的確感覺好良好

但另一邊窗, 又會覺得

四歲之嘛, 哥哥咁快就開始捨我而去啦

對於四年黎, 一路陪伴佢成長0既我黎講

實在有點兒接受唔黎....

你知嘛, 哥哥走左去以恒屋企唔夠一個鐘

我就居然老淚縱橫.....

不過, 呢個係成長必經階段

我又明白, 自己0既心態應該係要保持 TAKE IT EASY....

應該好似鴻仔咁, 個仔行轉背, 就要開香檳賀下自己... (但可惜, 我唔係佢)

哈, 無錯, 唔同人, 有唔同感受

鴻仔佢, 一知道哥哥離家出走, 就立即歡呼起黎.....

好, 講多無謂, 去相最實際

當晚約好左以恒, 各自食完飯

七點鐘過到佢地屋企

以恒0既威力, 真係好鬼大

平時食飯食足一個鐘0既朗朗, 呢晚只係食左半個鐘就搞掂啦

仲拿拿聲, 話要執行李....

想快快手, 跟佬走

只係簡單, 帶左朗朗被被, 草黎馬同牙刷

執好行裝之後, 就猛咁問我夠鐘未

好趕住著草咁款....

不過, 佢都叫做有小小良知0架喇

起碼, 臨閃人之前

都攬左我, 攬左細佬一野, 以示愛我地....

其實以恒住得好近, 只係住0係隔離0個座

所以, 我心裡面諗, 如果佢訓唔慣, 或者夜晚扭搵我

我都唔擔心, 有乜野事, 都可以立即過去接番佢過黎呀嘛

(最後, 條友仔不知訓得幾梳爽, 一覺訓到大天光, 諗都冇諗起我.....)

一上到去人地屋企

朗朗已經興奮到失晒控, 狂跑狂跳, 唔理媽咪

我當下真係有0的替以恒媽媽擔心, 真係好驚佢會收拾唔到殘局

你知啦, 0的細路玩起上黎幾顛喪至得架

萬一佢地玩到一兩點都唔收檔, 咁點算呢....

幸好, 朗朗都叫好生性

九點半倒, 就訓著啦, 無扭無喊

雖然係咁, 大家都唔好以為以恒媽咪無風無浪, 好掂檔

因為, 第二朝以恒六點正就起左身啦....

然後, 成班細路就又叫又跳

嘩, 六點呀大佬.....真係鄧佢難過......

不過, 真係要多謝以恒媽媽

以恒媽媽真係好有心機, 佢為小朋友整左個小帳蓬

形造出露營0既效果出黎, 讓小朋友極其興奮

哥哥呢晚真係爆開心呀

第二朝, 一見到我, 仲同我講: 媽咪, 我今晚會再去以恒度, 唔番黎架啦....

衰仔....真係...仔大不中留呀.....

好采, 我仲有個細佬豬陪0者

如果唔係, 實傷心死我...

 HEHEEE…

我地最近開左個 FACEBOOK 專頁呀

大家可以 CLICK 一 CLICK 呢度

再 LIKE 一 LIKE 0個度....

同我地做個朋友仔啦!!!!