星馬LEGOLAND爆開心之旅- DAY 1

10級開心

期待已久0既新加坡之旅, 終於來臨喇!!!

呢個旅程, 6日5夜

除左玩新加坡, 我地仲去埋馬來西亞 legoland 添

由於, 一直都搵唔到旅伴, 所以, 最後就只有我地一家四口+婆婆出發

雖然人少少, 但一樣咁開心

好, 去相

6月30日, 朗朗番埋最後一日學

下午, 我地就趕去機場

雖然, 係有小小趕, 但係, 如果遲一日出發

嘩, 機票就會貴幾百蚊一個, 所以思前想後, 最後仲係趕0係7.1前出發

哈, 一放學咋, 哥哥就失控狂笑

不斷同我講: 其實我尋日已經好緊張喇.....

今次執行李, 兩兄弟都有幫手

哥哥真係大喇, 仲記得對上一兩次執行李時

佢總係放埋0的無厘啦間0既野落去, 一時放堆筆落去, 一時就一堆玩具

今次, 佢終於識得執下0的紙巾呀, 衫呀實際0的0既野落去喇!!!

至於細佬呢....

梗係攪攪震, 無幫襯喇

差唔多執好之際, 又掉一堆玩具落去.....簡直係激死我.....

入到閘, 一齊睇飛機, 影下相

影黎影去, 都係哥哥....

細佬豬總係好跳脫, 叫親佢影相, 佢就三秒三跑鬼左去

哈, 真係好開心

可以同媽媽去旅行

媽媽年紀大喇, 對腳亦一年不如一年

所以, 0係佢仲行得食得訓得之年, 都想陪下佢, 一年同佢去一次旅行

最衰表姐仔要參加結業禮喇

同唔到我地一齊去威

朗朗真係好想與表姐同行架

yeah, 終於上機喇

接近4小時0既機程

面對差足晒電0既細佬, 你都咪話唔驚呀....

一時又要擒高擒低, 一時又要尖叫

後黎仲要除晒鞋, 0係飛機漫步

真係搞佢唔掂........

鴻仔俾佢玩到殘一殘, 個樣超無奈......

哥哥大喇, 易處理好多

自己能夠坐定定, 睇下電視, 一0的都唔麻煩

只係間中興奮症上身, 失控狂笑, 成個儍佬咁0者

去到新加坡, 已經係夜晚喇

諗住細佬訓左, 可以出去食下飯

點知, 哥哥又睡魔急call

最後, 邊度都去唔到

快快手買0的外賣上酒店

咁就玩完一日

day 1 完

HEHEEE…

我地最近開左個 FACEBOOK 專頁呀

大家可以 CLICK 一 CLICK 呢度

再 LIKE 一 LIKE 0個度....

同我地做個朋友仔啦!!!!