我要做個萬能媽媽

感恩, 一切已經塵埃落定

我地已經為細佬選定了一間心裡面覺得唔錯0既學校

而家淨落黎, 就只係需要安排下年接湊0既問題啦....

關於接湊上, 其實我都幾苦惱

因為哥哥學校, 去到 K3 0個年, 會由上午班改為下午班

而同樣的, 細佬都會係番下午

其實番學方面, 都尚可以安排到

但係放學呢, 就有小小論盡喇

因為兩兄弟0既放學時間相若, 但一個0係港島, 另一個0係九龍

諗呢樣野, 我真的諗到有點兒心力交瘁....

雖然心煩, 但日子仲係需要過

我成日同自己講, 唔駛諗咁多住

反正, 船到橋頭自然直嘛....

而且, 都仲未殺到埋身.....諗得多只會傷神....

同阿仔佢地開心渡聖誕好過啦, 哈哈.....

0係啱啱0既星期六

帶左兩隻野出城

一來係為左替哥哥拎 passport

二來係帶小朋友出去買聖誕禮物

行下行下, 居然舊地重遊

不禁讓我想起昔日種種

仲記得, 0個時啱啱生左魚仔冇耐

每日都會推住bb車, 帶哥哥經過這段路上N班的

哥哥當時, 大概只得兩歲四個月左右

每日放學, 定必要午睡

但我又點能夠推兩架BB車呢

好記得, 有一次, 哥哥真係頂唔順, 真係要訓喇

我最後, 搵左級樓梯, 抱住佢, 

將魚仔連人帶車拖埋一邊呆坐, 等哥哥訓醒, 然後再行過

又當時, 其實哥哥仲係好細, 有時都唔係好願行

間中, 0係行去搭車0既呢段路上, 都會扭計, 想抱

當時, 日子都唔易過架

接湊, 都有小小辛苦

但辛苦辛苦, 最後亦被我捱過了

唔知下年0既情況會係點

接湊會唔會好趕

又唔知, 會唔會趕唔上校巴, 搞到湊唔到是但一個仔

可能會好難捱, 可能又會好論盡

一切都係未知之數......

但我相信, 我一定會搞得掂!!!!!

我相信, 點難捱, 我都一定會捱得過!!!!

大概, 做媽媽就係要咁, 乜都要做得到, 乜都要搞得掂!!!!

我要繼續, 加油加油呀!!!!!

HEHEEE…

我地最近開左個 FACEBOOK 專頁呀

大家可以 CLICK 一 CLICK 呢度

再 LIKE 一 LIKE 0個度....

同我地做個朋友仔啦!!!!