每年12月對我同鴻仔黎講, 都特別有意思的
12月15日係我地0既結婚紀念日
而12月17日就係鴻仔0既生日
兩個人由結婚到現在
不知不覺, 已踏入第六個年頭
愛情亦不知不覺間, 昇華到另一個階段
還記得
頭幾年的結婚紀念日, 我倆都會好好的, 賀一賀佢
會買禮物氹下對方, 會去食下好野, 會去拍下拖仔咁
不過, 或者太多年啦
又或者, 係我衰啦, 好似鴻仔話齋, 我份人真係太冇趣味啦.....
近呢兩年, 我再冇送禮物俾鴻仔
今年結婚紀念日當天, 我們甚至沒有一起吃飯添.....
為左俾番小小浪漫鴻仔, 等佢覺得我份人有趣味小小
0係鴻仔生日當日, 我為佢預備了一餐BUFFET
原先係打算同佢拍拖去尖沙咀食 Cafe East
點知, 睇完食評......不得了........
點會咁架...........6歲樓下0既小童, 竟然係費用全免....
兩個人價錢, 四個人去食.....抵到咁.....
叫我點捨得只同鴻仔去二人浪漫呢......
於是, 我又再一次不懂情趣的, 打算帶埋兩隻仔去狂擦一餐
成件事, 真係激死了鴻鴻, 哈哈.......
0係鴻仔生日前一晚
佢終於忍唔住開金口
同我講..... 其實, 佢今年0既生日願望, 係生日正日, 全日都見唔到對仔....
講真, 我心裡面係有小小難過的
我覺得阿仔佢地, 其實都想同爸爸賀生日
但係, 爸爸0既想法, 居然係咁......
不過, 我都明0既
湊住佢地去食飯, 成日都滾水碌腳咁
一路食, 又要一路搞佢地食野, 又要安撫佢地情緒
成日都食而不知其味咁....有邊個想呢!!!!!
於是, 我都尊重佢0既生日願望
叫左婆婆睇住兩隻仔, 自己兩個出去二人世界
原先, 仲係諗住去Cafe East
點知, 原來生日0個個原來想食放題多0的
於是, 連行程都改埋
最後, 食旺角樂天大喜屋不過,
幸好冇食BUFFET咋.....
鴻仔食得咁鬼少, 帶佢出去食自助餐, 真係好鬼唔抵....
算啦, Cafe East 就留番我生日先食啦
到時一定要預埋兩隻仔0者, YEAH!!!!!
其實, 可能魚生0既新鮮程度同中環大喜屋係差唔多
不過, 我份人總係先入為主
總覺得中環正店好味0的
不過, 真係要讚佢0的蝦, 鮮味到不得了
我一個人食左十隻以上耶!!!!!
不過, 講到環境
當然旺角分店好好多啦
始終地方夠大, 唔會好似中環咁迫
而且所有野都好新淨
樂天蠔仔餅
呢個係佢地最新推介來的
味道其實都OK的
不過, 我個人仲係鐘意港式蠔煎蛋多0的
呢個極品煮鮮鮑
賣相極其吸引
不過, 個人覺得冇乜味道可言
呢個亦係推介之一
黑松露帆立貝小酥盒
我頗鐘意佢個酥皮喎, 而且夾帆立貝, 感覺好特別, 好得意, 讚!!!
其他壽司水準都唔錯!!!!
其實, 大喜屋0既放題, 一向都叫幾有水準
呢個真係好脆......又唔會太油
大愛大愛!!!!
一向好鐘意佢地0既燒菠蘿
又甜又多汁, 正!!!!
另外, 仲食左好多野, 牛柳粒, 雞翼都好正
不過就忙住食, 唔記得影相
其實, 放題黎講, 大喜屋0既熟食真係好唔錯
選擇又多, 水準又高.....
恭喜你, 鴻仔......
呢餐生日飯, 你終於可以食得清閒.....
可以慢慢的享受一頓飯啦!!!
祝你生日快樂, 並祝你早日接受到對仔啦....
其實, 佢地都唔係咁差勁0者
而且, 佢地兩個都好錫你架.....
願你地0係末來一年, 能夠相處融洽
我愛你地!!!!!
HEHEEE…
我地最近開左個 FACEBOOK 專頁呀
大家可以 CLICK 一 CLICK 呢度
再 LIKE 一 LIKE 0個度....
同我地做個朋友仔啦!!!!
沒有留言:
發佈留言