80後媽咪: 哥哥K2評估

2015年6月2日星期二

哥哥K2評估

今年真係過得超級勁勁快哦....

真係眨左一眼之嘛, 又到攞成績表0既時候啦....

今次去見家長, 再冇好似舊年同前年咁喇....
仲記得第一, 二次見家長, 真係好緊張....
0個種心情, 真係到而家都仲記得
仲嚴重過自己放榜一樣....
早一晚, 就諗好晒一大堆問題要問老師....

大概, 再唔係第一次....
而且, 近年都知道阿哥並唔係讀書0既材料
心裡面諗, 只要唔係俾老師瘋狂地投訴佢, 唔係考第尾....
即使考尾二, 都收貨啦....哈哈....
反正嘛..... 都只不過係幼稚園.....

其實, 真係都冇乜野特別需要憂慮吧.....

老師話哥哥0係班裡面, 叫中規中舉
主要都係寫字講野0既問題....
唉..... 其實到而家為此, 我都好煩惱朗朗0既寫字問題
雖然, 佢手字叫做好過鴻仔小小
但係, 寫直線仲係好彎彎曲曲咁架....
而家, 做親功課仲會因為寫得唔好而狂擦....
又其實, 我每日都要朗朗寫一頁紙, 諗住要佢練下字
但係..... 仲係改善唔到.....認真頭暈......
寫字呢一項.....朗朗攞C....
真係唔明, 朗朗個best friend沙律, 明明手字靚仔過朗朗好多....
但居然, 同朗朗同分, 都係C!!!
眼見依個結果....我都有少少欣慰......點知熊仔.........

熊仔就話....... "我解釋到依個現象, 其實佢地兩個唔係同一個level, 而係朗朗個D字已經衰無可衰, 老師好想比更低的grade 朗朗, 如果幼稚園成績表唔可以俾d e f 嗰d grade ,
佢一定無可能咁另攞c架......
其實老師都好無奈, c真係強迫性比架........
有咩值得欣慰啊......."

至於講野呢.... 其實朗朗咬字唔正一直係個問題....
而家已經做梗言語治療, 但係車仲係會讀成些, 7讀成室
除左呅字之外, 詞彙亦不如理想
成日都形容唔到想形容0既野
講野講到一舊舊....一0的都唔似五歲小朋友
有時, 我直頭認為, 細佬講野仲叻過佢....
條友仔....真係....冇得救......

唉, 都係0個句啦
其實朗朗真係唔係讀書0既材料黎架....
所以, 我仲係覺得, 大家輕鬆0的, 唔好迫得太緊
讀得上就讀, 讀唔上, 都唔好俾大家咁大壓力....哈哈....