80後媽咪: 可憐細佬豬

2015年11月18日星期三

可憐細佬豬

近呢半年....少左好多時間寫BLOG....
而家, 一星期先出到一篇
真係覺得有點慚愧....

其實有時都唔知自己忙乜架
每日總係來去匆匆
本來, 以為兩兄弟一齊番下午班之後, 我會偷到半天閒
點知, 佢地番左學, 我一樣..... 係咁咁咁忙.....
忙家事, 忙打掃, 然後準備晚飯....
忙一輪, 又話要趕接放學啦.....
唉..... 說好的要搞好 STUDIO.COM....
卻每日只能 PO 一兩次相....
真係自己都覺得自己有點 hea 哦....

踏入十月
我地開始停不了的溫習
唔係為左考小學, 又唔係為左迎戰小一
其實, 個人黎講, 仲係想俾朗朗hea多一年先架
但係.....學校開始默書啦....
每星期都要為下星期作戰
尤其朗朗, 佢並唔係0個種記性好好, 做事細心0既人
每次默書, 都總要花上好多時間, 先能得到合格0既成績.....
真心覺得呢種生活好辛苦.....
下年升上小一, 然後.....一星期默兩次書....
真係諗起都感到大恐慌
我大概要打柴鳥......

除左煩哥哥要溫習
最近仲為左細佬0既事而苦惱
細佬豬佢, 其實一直都好好
係脾氣大0的0者, 講野時眼睛唔望人
一直我都覺得佢問題唔大....
一直都覺得, 細佬進度慢, 講野唔叻, 小手肌差0的
係因為我太 focus 0係哥哥度
直到.....有一次同朋友傾開
開始發現, 其實佢可能係有。自。閉。傾。向。的......
講到呢度, 心裡面.....實在有點難過.....
然後, 再一輪觀察...
又發現, 原來, 除左哥哥之外
細佬佢係好少同其他小朋友玩的
即使去到公園, 大把小朋友, 或者係哥哥0既朋友一齊玩
佢好多時, 都只會自己一個呆著, 或者自己跑來跑去
永遠都唔會同人交流架......
後來, 我地再同老師講佢0既情況
老師0既回覆係, 佢有呢方面傾向.....
真係晴天霹靂.......
後來先知, 原來小手肌差, 講野進度慢都係一種病徵黎架.....

不過, 說實的
後黎, 接受左事實之後
我地都唔係話太過擔心
因為, 其實我自己由細到大, 都好靜架
仲記得, 小學六年生涯, 我都係得一個朋友
讀幼稚園時, 老師都問我媽媽, 佢0係屋企係咪咁靜.....
而家諗番轉頭, 我都可能係自閉傾向的
只係當年, 冇人留意到吧....
而且..... 我0係度諗, 細個自閉, 又唔等於大個一定變宅男0者....
我咪一個生勾勾0既例證囉....
中學之後, 我活潑得可怕.....
而家個人永遠都雞啄唔斷哦.....